Santiago de Compostela, 8 de abril de 2021.-  Sobre a visita do ministro de Transportes, Mobilidade e Axenda Urbana, José Luís Ábalos, o BNG fixo entrega dunha carta ao alcalde “para que conste por escrito cales son as peticións que entendemos que o Concello de Santiago ten que facerlle, toda vez que non se facilita que participen todos os grupos municipais nesa xuntanza”, explicou Goretti Sanmartín.

“Ás veces hai reunións bilaterais en que o alcalde deixa cuestións sen tratar” e, entre elas, destacou que hai unha proposición do BNG de novembro de 2019 que recolle obras comprometidas e pendentes de execución, moitas delas procedentes do Foro Cívico, que todos os grupos da Corporación están de acordo. Fixo referencia ademais a unha proposta anterior do BNG de 2018, aprobada por unanimidade, con estes asuntos pendentes por parte do Goberno do Estado en materia de Infraestruturas.

Así, referiuse á construción da estación de mercadorías da Sionlla, ao plan de usos para a vella terminal da Lavacolla e ao proxecto de humanización da rotonda de Conxo valorado en 300.000 euros “que representa unha cantidade insignificante para Fomento, sobre o que viñeron ministros e ministras facerse a foto e agora nin sequera o inclúen nos Orzamentos Xerais do Estado” cando é unha obra necesaria para vertebrar o barrio, diminuír a contaminación acústica e solucionar os problemas de seguranza viaria.

Tamén inclúe a revisión do convenio da estación intermodal para conseguir que se elimine a cláusula dos 3,5 millóns de pasaxeiros/as para facer a segunda fase e que debería ir acompañada dun aparcadoiro subterráneo.

Lembrou tamén a disposición adicional 135 dos Orzamentos de Estado para 2018 sobre o apoio ao Consorcio de Santiago para as actividades do Ano Santo de 2021, que non está derrogada, “e recolle que ten que haber unha achega especial para 2021 e entendemos que tamén para 2022 ao ser ambos anos xacobeos”. “Non ten sentido que para o ano Xacobeo a achega estatal do orzamento do Consorcio sexa o mesmo que nun ano normal, cando xa foi minguando nos últimos exercicios”, destacou. O BNG defende que o Consorcio contribúa a revitalizar a Cidade histórica, coa compra de baixos para a súa rehabilitación e destinalos a novos estabelecementos por parte de persoas que queiran emprender os seus negocios por primeira vez.

Outro dos temas a incluír é unha dotación orzamentaria para políticas de rehabilitación de vivendas, de espazos e conxuntos patrimoniais na cidade. “Como BNG, levamos ao Pleno a proposta para recuperar as ruínas da Caramoniña e o Estado debe facer a súa achega e tamén para contribuír á mellora das diversas ARI do concello”, sinalou.

Xunta de portavoces sobre remanentes

O BNG, logo da xunta de portavoces para tratar o destino dos remanentes de 2020, trasladou en rolda de prensa as apreciacións sobre “a falta de seriedade ante a reducida execución dunhas contas da leiteira, que son as que bota o alcalde desta cidade”, afirmou Goretti Sanmartín. Así, referiuse a que o alcalde primeiro expuxo unha cantidade, logo outra e fala unha e outras veces de obras e de axudas que non acaban de executarse.

Inicialmente, o BNG reclamou dedicar 3,5 millóns de euros para axudas directas para axudas aos sectores máis afectados pola pandemia da covid-19, cantidade que o grupo de Goberno tivo que aceptar ante a petición do conxunto da oposición. Logo resultou ser menor a dispoñibilidade, ao incluír o PSOE obras consignadas en 2019 que non se executaron e que volven a formar parte dos remanentes de 2020. “O problema de fondo é falta de xestión, de axilidade e de eficacia e vai ligado á liquidación do ano 2020 onde volveremos a ver unha execución baixísima en investimentos que probabelmente roldará o 20%”, advertiu. Isto significa que, como vén acontecendo nos últimos anos, de cada 100 euros que hai para gastar en investimentos, 80 fican sen executar, engadiu.