Santiago de Compostela, 12 de setembro de 2022.-  O BNG rexeitou a proposta do PSOE sobre a forma de xestión do servizo do ciclo integral da auga en Santiago de Compostela, que non saíu aprobada e prevía un contrato de 450 millóns de euros cunha duración de 25 anos máis prórrogas.

O BNG non partilla a presunción de que un servizo concesionado funciona mellor e é máis barato, tamén é consciente das trabas legais existentes na actualidade para recuperar servizos para a xestión directa, a comezar pola taxa de reposición. Con todo, xulga que o menos que pode facer un concello é analizar con calma, rigor, transparencia e participación as opcións posíbeis.

Segundo explicou Goretti Sanmartín no Pleno, o BNG súmase ás voces que reclaman unha auditoría externa imparcial sobre a xestión da auga en Santiago e que se teña en conta que un servizo esencial como é a auga debe ficar á marxe do enriquecemento ou a especulación. A veciñanza ten dereito a coñecer o déficit en infraestruturas neste servizo, que o propio PSOE recoñece e que sabe que pode chegar mesmo até os 100 millóns de euros, explicou.

Ademais, o PSOE creou o baleirou de contido a Comisión da auga. “O ético é escoller despois dunha análise rigorosa e de pór enriba da mesa as dúas opcións: a xestión directa e a indirecta, sopesando os puntos fortes e os débiles de cada opción”, indicou. “O goberno néganos esa posibilidade e lévanos a reunións trampa, con ordes do día que pretenden distraernos con detalles que non son menores”, mais elude analizar, en caso de apostar pola concesión, as garantías de subrogación de traballadoras e traballadores e o mantemento das súas condicións laborais, como defende o BNG.

Por outra parte, son varias as asociacións veciñais que reclamaron un debate sereno sobre este servizo e o seu modelo de xestión. “A un ano da fin do mandato é imposíbel que se adxudique este contrato, o PSOE só pretende vitimizarse e converter a oposición en responsábel da súa ineficacia e da súa negativa ao funcionamento dunha Comisión de estudo de xestión integral da auga”, indicou Goretti Sanmartín.