Santiago de Compostela, 30 de setembro de 2021.-  O Pleno de setembro aprobou a proposición do BNG para que o Goberno local elabore, con medios propios, un plan estratéxico de subvencións e se camiñe cara ao adelgazamento das subvencións nominativas de cara aos próximos orzamentos municipais. Aprobouse cos votos de BNG, CA e PP; o PSOE abstívose.

Ademais, mentres este plan non se realiza, o acordo inclúe que o Goberno local se comprometa a utilizar os instrumentos normativos existentes, nomeadadamente a Lei de subvencións, para continuar atendendo as diversas necesidades de entidades e colectivos, considerando sempre a ponderación do uso dos principios xerais de publicidade, transparencia, concorrencia, obxectividade, igualdade, non discriminación e eficiencia na asignación e utilización dos recursos públicos.

Para a aprobación, seguimento e avaliación do plan estratéxico de subvencións, procederase á creación dunha comisión de seguimento en que se integrarán a Intervención xeral do Concello, unha persoa representante de cada unha das áreas e entidades xestoras de subvencións, así como representantes de cada grupo político da Corporación. Esta comisión deberá avaliar información de cada liña e tipo de subvención proposta, así como as subvencións concedidas, xustificadas, as renunciadas e as reintegradas (ou en procedemento de reintegro); o grao de cumprimento dos seus obxectivos específicos e do seu prazo de consecución; os custos efectivos en relación aos previsibles, do seu plan de acción e dos seus indicadores cuantificábeis; as repercusións orzamentarias e financeiras que se derivan da aplicación do plan e as suxestións para a elaboración dese plan estratéxico de subvencións, segundo recolle a iniciativa.

O BNG tamén conseguiu que se aprobase crear un plan de reactivación económica para zonas afectadas polas obras e consensuar cos sectores afectados como comercio e hostalaría, entre outros, e dentro das marxes legais e competenciais, o obxecto e procedemento da subvención. Esta proposición do BNG resultou aprobada cos votos de BNG e CA e as abstencións de PSOE e PP.

O Goberno local mantivo durante a tempada alta a realización de obras en rúas moi transitadas, o que ocasionou severas perdas económicas a pequenos negocios de comercio, bares e restaurantes, fundamentalmente. Isto produciuse nun período de desescalada da pandemia da covid-19, cando podería coincidir o inicio da súa recuperación, expón o texto da proposición.

A modo de exemplo, a inicios de agosto anunciouse unha prórroga nos traballos da rúa dos Concheiros, coa ampliación até o 12 de novembro. A falta de planificación destas obras, coa rúa cortada ao tráfico e a mala adecuación de paso para peóns nunha grande amplitude en vez de realizar a actuación por tramos e informando a veciñanza, xunto coas modificacións do proxecto derivadas de imprevistos que provocaron un incremento dos prazos motivou que estes comercios, bares e restaurantes atravesasen un verán con dificultades para a súa supervivencia.

De feito, estes negocios dos Concheiros que permaneceron abertos durante as obras estiman que reduciron a facturación en máis dun 50% á parte dos que optaron por pechar. A isto hai que engadir o malestar xerado na veciñanza por non habilitar zonas de paso seguras e sen risco de caídas e lesións, á parte da sucidade que xeran as obras e da proliferación de ratas que saíron á superficie.