Santiago de Compostela, 28 de maio de 2023.- A candidata do BNG á Alcaldía de Santiago, Goretti Sanmartín, votou na facultade de Filosofía, acompañada de Ana Pontón. En declaracións aos medios, sinalou que agarda que a xornada transcorra sen incidencias e co maior número de participación posíbel  porque "iso será bo para Santiago de Compostela"

Animou a veciños e veciñas de Santiago a exercer o seu voto, "porque teñen o poder de decidir quen van ser representantes na próxima Corporación municipal e quen será alcalde ou alcaldesa".

A preguntas de xornalistas, sinalou que "hai moitas persoas indecisas, segundo as enquisas, que poden ser determinantes para o futuro" e, por iso, fixo un chamamento á votación "porque cada voto conta".

"Levamos tendo moi boas sensacións durante toda a campaña, con xente que recibe moi ben as nosas mensaxes e a ver o que pasa ao final da xornada", concluíu.

No percorrido polas mesas electorais, Goretti Sanmartín e Ana Pontón estiveron acompañadas por Néstor Rego, Míriam Louzao e Rubén Cela.