MEMORIA HISTÓRICA

O BNG anuncia propostas destinadas á recuperación da memoria histórica na efeméride dos Mártires de Carral

Goretti Sanmartín na sala de prensa do pazo de Raxoi
Goretti Sanmartín na sala de prensa do pazo de Raxoi

“Retiraremos a simboloxía franquista que aínda permanece en Santiago de Compostela”, afirma Goretti Sanmartín

O BNG anuncia propostas destinadas á recuperación da memoria histórica na efeméride dos Mártires de Carral

Santiago de Compostela, 25 de abril de 2023.- A candidata Goretti Sanmartín anunciou, na efeméride da Revolución Galega de 1846 e dos Mártires de Carral, as medidas do BNG destinadas á recuperación da memoria histórica, co recoñecemento e difusión de persoas e acontecementos significativos en Santiago de Compostela.

“O candidato do PSOE di que cada un é dono dos seus silencios, xustificando calar determinada información e desde o BNG dicimos que os silencios son ocultación, engano, complicidade, desmemoria”, afirmou. “Podemos falar do que significan os silencios na violencia de xénero e tamén na memoria histórica”, engadiu Goretti Sanmartín.

Co BNG no goberno local celebrarase como merece o episodio da Revolución de 1846 onde se proclamaba a liberdade e a dignidade para Galiza e que tivo a finais de abril San Martiño Pinario como un dos escenarios principais, entre outros lugares de Santiago de Compostela. “Retiraremos a simboloxía franquista que aínda permanece na cidade, a comezar pola da praza da Quintana”, explicou.

Ademais, colocaranse as placas na que foi prisión de Santa Isabel e tamén na terminal do aeroporto, onde traballaron presos do campo de concentración.

“Poremos placa e rúa para lembrar Consuelo Otero Rial, veciña de Conxo asasinada no 1936, para desenvolver unha política de recuperación de memoria das mulleres cun programa específico desde o Concello”, sinalou entre as medidas do BNG. “En definitiva, desde o BNG apostamos por apoiarnos no pasado para coñecer a nosa historia mais para que iso sirva para impulsarnos e avanzar”, concluíu.

 

O BNG anuncia propostas destinadas á recuperación da memoria histórica na efeméride dos Mártires de Carral