Rubén Cela reclama unha planificación escolar para os vindeiros cursos que atenda as necesidades de previsión de crecemento de cada zona de Santiago

Santiago de Compostela, 3 de marzo de 2016.- O grupo municipal do BNG expresou o seu apoio ás demandas da asociación de nais e pais do centro de educación infantil Raiola, afectada pola falta de prazas no CEIP Lamas de Abade onde está adscrito.

O CEIP Lamas de Abade só dispón de 4 prazas para o primeiro curso de primaria en 2016-2017 ás que optarían crianzas de Raiola, Marrozos e o Eixo; cando Raiola ten xa 19 nenos e nenas que solicitaron praza pola súa proximidade e, nalgúns casos, por teren irmáns e irmás neste colexio. O outro centro da zona, o CEIP Ramón Cabanillas, tampouco dispón de prazas para novo alumnado externo nin posibilidades de ampliación de equipamento, segundo anunciou. Deste xeito, a oferta de prazas de escolarización nesta área resulta insuficiente.

Así, o BNG reclama do Concello e da Xunta unha planificación escolar para os vindeiros cursos que atenda as necesidades de previsión de crecemento de cada zona de Santiago de Compostela, co fin de favorecer a conciliación familiar e a educación de rapaces e rapazas na súa contorna vital.