Santiago de Compostela, 26 de febreiro de 2023.- O BNG congratúlase de que o grupo parlamentar do PP acolla agora a proposta da Plataforma pola creación dun conservatorio profesional de danza en Santiago de Compostela, dous anos despois de que Goretti Sanmartín defendese esta iniciativa no Concello de Santiago.

“É a mostra da dobre moral do PP nas vésperas das eleccións, mais oxalá sexa real ese anuncio de que están a favor e estas instalacións sexan unha realidade e cumpran o compromiso de reclamarlle o Conservatorio de Danza á Xunta”, explicou Goretti Sanmartín, portavoz municipal do BNG en Santiago. Neste sentido, reclamou que o compromiso se faga por escrito, con orzamento e prazos de execución.

Cómpre lembrar que o PP votou en contra da emenda do BNG para incluír a construción do Conservatorio de Danza nos Orzamentos da Xunta para 2023, tamén vetou unha iniciativa presentada pola deputada Mercedes Queixas en 2020 e se abstivo cando se presentou a proposición do BNG no Concello de Santiago.

Esta semana o grupo parlamentar do PP, segundo fixo público a plataforma, coincidíu na importancia da creación dun Conservatorio de Danza e da oportunidade que se presenta en Compostela, logo de que o Concello se comprometese na cesión dos terreos á Xunta para realizar estas instalacións. Esta iniciativa conta cun grande apoio social, con 5.000 sinaturas recollidas, e tamén da Federación de ANPA -que agrupa máis de 60 asociacións de Galiza- e da totalidade de sindicatos de ensino que compoñen as distintas mesas de educación.