Santiago de Compostela, 17 de marzo de 2022.- O grupo municipal do BNG reclama que o Goberno local realice as obras necesarias para arranxar o desnivel do cruzamento da Costa Nova de Abaixo coa avenida de Xoán XXIII para mellorar a seguranza viaria e peonil.

Na embocadura da Costa Nova de Abaixo coa avenida de Xoán XXIII existe un pronunciado desnivel na unión co paso de peóns, cunha fochanca lonxitudinal, que provoca problemas a moitos vehículos que descenden por esa vía en pendente.

De feito, cando chove e a auga queda empozada algúns coches teñen dificultades para sacar as rodas da fochanca e mesmo chocan coa defensa contra a superficie de asfalto.

Outro dos problemas é que un dos contedores de residuos ocupa parte do paso de peóns e dificulta o paso cando hai moita afluencia por esa rúa, sobre todo en horario de entrada e saída de centros de ensino e universitarios que están nas proximidades.