Santiago de Compostela, 15 de marzo de 2022.- A portavoz do grupo municipal Goretti Sanmartín mantivo un encontro con diversos comerciantes e veciñanza da avenida de Rodríguez de Viguri, afectados pola supresión de prazas de aparcamento sen ofrecerlles unha alternativa por parte do Goberno local. Así, trasladará ao Pleno de marzo a solicitude de que se inclúa esta avenida na área 3 de residentes do aparcadoiro de Altiboia, recentemente remodelado a raíz dunha proposta do BNG, tendo en conta que a maioría das prazas están baleiras de día e de noite.

Coa posta en marcha do aparcadoiro de Altiboia asignouse un espazo reservado para residentes, co que reclaman tal e como se comprometera o Goberno local a brindarlles tamén esa posibilidade á veciñanza e negocios de Rodríguez de Viguri, para facilitar a busca de aparcamento.

“Este Goberno local debe dialogar, coñecer e dar resposta a peticións da veciñanza ademais de prever espazos alternativos de estacionamento antes de suprimir os lugares habituais, posto que este xeito de proceder causa graves molestias, perda de tempo e de recurso económicos á veciñanza, que percibe o tráfico como un dos principais problemas de Santiago de Compostela”, explicou Goretti Sanmartín.

Deste xeito, o BNG solicitará no Pleno de marzo que o Goberno local inclúa na área 3 de residentes a avenida Rodríguez de Viguri de tal maneira que poidan utilizar estas prazas do aparcamento de Altiboia, toda vez que lles suprimiu as prazas que antes estaban dispoñíbeis á beira dos edificios.