Santiago de Compostela, 13 de maio de 2022.- A portavoz municipal do BNG, Goretti Sanmartín, reclama a ampliación do prazo de solicitude de bolsas de comedor e material escolar ante os problemas vinculados á administración electrónica, que derivaron do Rexistro municipal ao da Xunta ás familias para realizaren esta xestión.

Segundo a información que trasladaron ao BNG, isto agrávase cunha comunicación que recibiron aquelas persoas que cursaron a solicitude nos primeiros días do prazo, en que se lles indica que deben volver presentar a documentación debido a que non quedou ben rexistrada.

Para o BNG, o Concello de Santiago debe facilitar e ampliar este prazo, que remata o 18 de maio, para fomentar a participación en comedores e actividades de conciliación, pois é unha medida para brindar a igualdade de oportunidades a nenos e nenas.

Ademais desta situación caótica no procedemento das bolsas de comedor e material escolar, faltan por anunciar as actividades de conciliación nos centros de ensino, cando é necesario que se convoquen para facilitar a organización das familias de cara ao verán. Así, a falta de coñecemento de prazas de actividades en centros de ensino organizadas polo Concello de Santiago, xunto con definir os centros en que se desenvolven, favorece os modelos privados e relixiosos, pois xa é tarde para a organización das familias durante as vacacións escolares. Neste sentido, o BNG reclama que se inclúan tamén durante o mes de agosto, pois son moitos pais e nais que traballan nese período e precisan actividades, campamentos urbanos e obradoiros municipais para as crianzas.

O BNG advirte da falta de criterio e do silencio do concelleiro e insiste na necesidade de que o Concello de Santiago realice unha programación anual de actividades de conciliación (Nadal, entroido, Semana Santa e verán), para ter unha maior previsión na súa organización, tal como se aprobou en Pleno en novembro de 2016, pois isto  facilita a coordinación das actividades tanto no ámbito municipal como para as familias.