Require un plan de actuación global para corrixir os graves problemas de asfaltado tanto nas zonas urbanas como rurais de Santiago de Compostela

Santiago de Compostela, 4 de novembro de 2015.- O grupo municipal do BNG, ante as queixas recibidas da veciñanza do Castiñeiriño, reclámalle ao Goberno local o arranxo urxente do pavimento de diversas rúas, xa que está inzado de grandes fochancas que supoñen un perigo para a seguridade. O BNG, ante o estado lamentábel en que se encontra a rede viaria de Compostela, segue a trasladarlle esta demanda ao executivo municipal, para que actúe de inmediato cun plan global e corrixa as deficiencias detectadas no asfaltado, tanto nas zonas urbanas como nas rurais, tendo en conta que se trata dunha reivindicación maioritaria.

En concreto, nesta ocasión sinalan a proliferación de buratos que se atopan no pavimento das rúas Divina Pastora e da Granxa do Castiñeiriño, xunto cunha fochanca de grandes dimensións situada na Travesa de Cantarrá, co afundimento da rúa.

Outras zonas que tamén están afectadas pola deterioración do asfalto son a rúa da Estrada e o Combarro, nos tramos próximos á vía do ferrocarril.

Deste xeito, o grupo municipal nacionalista requírelle ao Goberno de Compostela Aberta que emprenda, canto antes, un plan continuado de arranxo de fochancas antes da chegada do inverno e que se preocupe da conservación das estradas municipais co fin de mellorar a seguridade viaria en Santiago de Compostela.