“É notorio que a cidade de Santiago está cada vez máis desgaleguizada nas actividades que dependen do Concello” , afirma Rafael Vilar. Están a provocar “importantes retrocesos lingüísticos” en espazos culturais onde o uso do idioma galego “era cotiá e gozaba de prestixio social”

Santiago de Compostela, 2 de marzo de 2015.- O grupo municipal do BNG reclámalle ao alcalde de Santiago que corrixa a tendencia actual da Banda Municipal de Música para recuperar o papel normalizador e de prestixio da cultura e da lingua galegas nas súas funcións.

Segundo explicou o concelleiro Rafael Vilar, a Banda Municipal de Música de Santiago de Compostela ten a responsabilidade de proxectar socialmente a produción cultural en galego, mais nos últimos tempos o público trasladou queixas ao BNG, tanto polo repertorio como pola falta de uso do idioma galego nalgúns programas de man publicados e distribuídos ao inicio da función.

“É notorio que a cidade de Santiago está cada vez máis desgaleguizada nas actividades que dependen do Concello, cando con anterioridade a institución municipal desenvolveu políticas pioneiras na promoción do uso do galego”, indicou o concelleiro. Accións como estas da Banda Municipal de Música están a provocar “importantes retrocesos lingüísticos” en espazos culturais onde o uso do idioma galego “era cotiá e gozaba de prestixio social”.

Deste xeito, o BNG preguntoulle ao alcalde que ten previsto realizar para corrixir esta tendencia da Banda Municipal de Música co obxectivo de que recupere o papel normalizador e de prestixio da cultura e da lingua galegas no seu repertorio.