“De 178,92 a 455,90 euros; de 205 a 477”: denuncia Goretti Sanmartín a suba do prezo da factura da luz nun ano mentres as empresas eléctricas multiplican os seus beneficios

A organización nacionalista presenta a campaña “Os prezos soben, os teus cartos baixan” con medidas urxentes para paliar a suba descontrolada dos prezos e o empobrecemento das clases populares

O deputado do BNG no Congreso, Néstor Rego, e a portavoz municipal da formación nacionalista en Santiago, Goretti Sanmartín, presentan a campaña de denuncia pola suba de prezos incontrolada que está provocando o empobrecemento das clases populares. Reivindican a adopción de medidas sólidas e urxentes para dar solución a este problema e que a organización nacionalista xa trasladou ao Goberno do Estado, a destacar a intervención pública no sector eléctrico ou a baixada dos impostos nos carburantes. Así mesmo, chaman a mobilización nacional convocada polo BNG para o vindeiro domingo, 3 de abril, en Santiago de Compostela para que tanto o goberno galego como o do Estado actúen de forma inmediata e áxil para paliar a crise.

Goretti explica a campaña de difusión que o BNG está levando a cabo para explicar as medidas que a organización defende co obxectivo de paliar a crise de prezos. “Esta campaña culminará o vindeiro domingo, 3 de abril, cunha manifestación nacional convocada pola organización nacionalista en Santiago de Compostela, con saída da Porta do Camiño” destaca.

Os prezos soben, os teus cartos baixan. Fagámonos valer, hai alternativas!

“Hoxe quixemos enfocar a nosa denuncia pola suba incontrolábel dos prezos da luz. Por iso a xente está protestando coas facturas da luz con cantidades substancialmente diferentes na do mes do ano anterior e a desta ano” explica a portavoz municipal. Sanmartín exemplifica esta suba cunhas das facturas: “de 178,92 a 455,90 euros; de 205 a 477”. Unhas cifras que se duplican nun ano e “nin a Xunta de Galiza nin o Goberno do Estado están poñendo e arbitrando medidas que freen esta situación”.

Pola súa banda, o deputado do BNG no Congreso denuncia que “cando hai milleiros de familias, negocios, pequenas e medianas empresas e mesmo autónomos nunha situación de crise, o Goberno diga que vai esperar para ver que medidas adoptan o próximo día 29”. Para Néstor Rego, hai tempo que o executivo tiña que ter tomado medidas e decisións, mais apunta a submisión da Administración estatal “que actúa ao ditado do oligopolio eléctrico” exemplificándoo co suceso do Real Decreto modificado en tan só un mes pola oposición mostrada polas eléctricas.

“Non é de recibo este comportamento por parte do Goberno. Neste último ano, as tres grandes eléctricas tiveron de beneficios 6.500 millóns de euros incrementándoos, en relación co ano anterior, en 10%” subliña o deputado nacionalista. Denuncia a situación mentres que as empresas eléctricas multiplican eses beneficios as familias non poden pagar a electricidade nun contexto de suba xeneralizada de prezos como carburantes, alimentos ou servizos.

O deputado nacionalista lembra as medidas que entregou aos representantes do Goberno do Estado na reunión mantida o pasado martes e na que trataron a suba incontrolada dos prezos da enerxía e os combustíbeis. Destaca a proposta para unha intervención pública do mercado eléctrico e nos beneficios “chovidos do ceo” das eléctricas para controlar os prezos e a garantía do acceso á enerxía como un ben básico. “Defendemos desvincular o mecanismo de fixación dos prezos do gas nos mercados internacionais e mudar o sistema de pool e estabelecer prezos máximos” enumera.

“Para alén, reclamamos unha Tarifa Eléctrica Galega como País produtor escedentario da enerxía eléctrica, así como quitar da factura todos aqueles cargos e peaxes que non teñen que ver coa xeración e distribución da electricidade e, no medio prazo, unha regulación do sector eléctrico modificando os criterios do mercado marxinalista” enfatiza Rego. Mesmo sinala a necesidade de que existan empresas públicas que xestionen a enerxía e permitan modular máis facilmente o prezo da enerxía eléctrica.

No ámbito dos combustíbeis reivindica unha baixada temporal dos impostos dos hidrocarburos- máis da metade do custo- até que se estabilicen os prezos. “Baixar o IVE a superreducido dos produtos esenciais, alimentación ou servizos básicos porque é o lóxico. Hoxe a electricidade ou o gas son produtos esenciais” explica o deputado. Paralelamente, defende unha reforma fiscal para garantir “que pague máis quen máis ten” a través do imposto de Patrimonio, imposto para as grandes fortunas, etc.

“Chamamos o Goberno para que actúe xa” urxe Rego mentres apunta que o resto de países da contorna xa tomaron medidas para paliar a situación. “O Goberno galego tamén ten que comezar a actuar como un goberno deste País. Non pode pórse de perfil e debe facer moito máis do que está facendo a Xunta de Núñez Feixóo” conclúe Rego.