Coa eliminación dos trámites presenciais existe un atranco importante para as persoas que non dispoñen de medios informáticos nin sinatura electrónica
 

Santiago de Compostela, 20 de febreiro de 2022.- O grupo municipal do BNG reclama que se habiliten e reforcen os puntos de acceso de información para favorecer a transición cara á administración electrónica e que se permita a presentación de trámites e solicitudes vía presencial e escrita para aquelas persoas que o desexaren de acordo coa normativa en vigor. No ámbito financeiro, o Concello de Santiago tamén debe contribuír a frear a falta de servizos presenciais que ofrecen os bancos, que mesmo teñen agora que recuar das súas pretensións de recortes na atención cidadá.

Así, o BNG trasladará unha iniciativa ao Pleno ante as queixas da veciñanza recibidas coa  implantación da administración electrónica, derivadas dos problemas suscitados pola fenda dixital; isto é, coa eliminación da posibilidade de presentar solicitudes e realizar trámites pola vía escrita e presencial existe un atranco importante para a maioría das persoas que non dispoñen de medios informáticos, sinatura electrónica ou certificado electrónico, ao que se unen os protocolos de prevención da pandemia da covid-19.

Isto representa un veto a participar en determinadas actividades organizadas desde o propio Concello e á hora de realizar trámites, ao non facilitar o seu desenvolvemento do xeito que era tradicional. Así, as persoas maiores están a sufrir, de maneira especial, esta discriminación cando non se permite o rexistro de inscrición de xeito presencial para actividades dirixidas a este colectivo, por exemplo, ou para solicitar o pagamento fraccionado de impostos cando nin sequera estivo operativo o teléfono para a cita previa presencial. Do mesmo xeito que cando as persoas usuarias reciben as notificacións vía telemática e non dispoñen dos medios nin da formación adecuada para poder descargar o seu contido. Ou cando se habilitaron, inicialmente, só vía telemática as convocatorias para comedores e solicitudes de axudas para material escolar, unha situación que se corrixiu logo das correspondentes protestas.

Puntos de acceso á información para realizar os trámites

Deste xeito, a administración local debe dispor de puntos de acceso á información, con persoal especializado, para axudar a realizar estes trámites de xeito presencial e telemático, cando menos durante os primeiros anos de transición cara a este modelo, co fin de garantir que a cidadanía poida adaptarse e continuar a desenvolver os trámites recollidos na carta de servizos municipais.

Cómpre lembrar que, na actualidade, só teñen obriga de comunicarse electronicamente coas administracións as persoas xurídicas, as entidades sen personalidade xurídica e quen exerzan unha actividade profesional para a que se requira colexiación obrigada, para os trámites e actuacións que realicen coas administracións públicas no exercicio desta actividade profesional.