“Este Goberno local do PP está absolutamente trufado de corruptelas, de abuso de poder e de falta de transparencia e de rigor”

Santiago de Compostela, 13 de decembro de 2013.- O portavoz do grupo municipal nacionalista en Raxoi, Rubén Cela, reiterou a petición de dimisión inmediata de Juan de la Fuente e do resto de membros da Corporación imputados “en casos de corrupción, de abusos de poder e de malas prácticas na xestión desta institución”, logo de que transcendese o resultado do informe pericial que conclúe que este concelleiro do PP asinou seis facturas para cobrar axudas de asociacións veciñais.

O nome de Santiago de Compostela volve ser centro de atención informativa “asociado a corrupción, a abuso de poder ou a malas prácticas” polo caso das facturas falsas de Juan de la Fuente, “que veñen evidenciar que este goberno do PP non só é o peor Goberno da historia democrática de Santiago de Compostela senón que, con diferenza, é o que máis dano e prexuízo lle ten provocado á cidade”.

Un Goberno indigno que avergoña a veciñanza

“Este Goberno local do PP está absolutamente trufado de corruptelas, de abuso de poder e de carencia de transparencia e de rigor no día a día, é un Goberno á deriva e agonizante e que na súa deriva se está a levar por diante a Santiago de Compostela”, afirmou con rotundidade por portavoz nacionalista. “É un Goberno sen dirección e sen proxecto de futuro, porque está máis preocupado polas súas causas xudiciais que polos problemas cotiás da veciñanza e que se ve incapaz de xestionar o día a día dunha cidade como Santiago de Compostela”, dixo. Destacou tamén que é “un Goberno indigno” que avergoña o conxunto da veciñanza que non merece padecer isto por máis tempo.

A comisión de investigación, a petición da oposición

“É máis que previsíbel que digan que este Goberno é o máis transparente do mundo porque permitiu crear unha comisión de investigación interna e que non teñen moito que dicir porque non está rematada”, explicou. Dende o primeiro momento das sospeitas de irregularidades nas facturas das asociacións veciñais para xustificar subvencións, o BNG esixiu que se depurasen as responsabilidades “caese quen caese” e, por ese motivo, defendeu a creación dunha comisión de investigación interna. “Non se creou porque a impulsase o alcalde nin grupo de Goberno; foi a oposición quen trasladou esa petición ao Pleno e a presión política e social conseguiu que se puxese en marcha a investigación”, indicou. “Juan de la Fuente foi a única persoa que se negou a responder as preguntas dos grupos da oposición e el ben sabería por que non quixo”, lembrou Rubén Cela.

Esta comisión chegou á conclusión de que había “facturas falsas e falsificadas nos dous expedientes analizados e que puidera existir unha suposta suplantación de identidade no expediente da asociación de veciños de Vidán”, onde se detectou que Juan de la Fuente a pesar de non formar parte da directiva, dende había tempo, o enderezo electrónico a efectos de notificación era o seu correo corporativo de concelleiro e o enderezo postal era o da súa propiedade.

Perante iso, a comisión acordou darlle traslado á Fiscalía e ao Tribunal de Contas e iniciar o expediente de reintegro daquelas subvencións. No momento en que se realiza a imputación de Juan de la Fuente, o BNG esixiu a súa dimisión inmediata e o PP procedeu a un peche de filas e declaracións que anunciaban “confianza plena do Goberno municipal no concelleiro Juan de la Fuente”.

Complicidade da dirección do PP

“O informe pericial determina feitos gravísimos”, indicou Rubén Cela, “Juan de la Fuente non debería seguir na Corporación e se segue é exclusivamente porque Ángel Currás e a dirección do PP llo permiten de xeito cómplice”. “Entre outras cousas porque o alcalde debería ser o primeiro en dimitir das súas funcións”, explicou.