Rubén Cela requírelle ao alcalde que non esqueza reclamar este sistema de seguridade nas negociacións que ten abertas co ADIF e con Fomento

Santiago de Compostela, 23 de xullo de 2014.- O portavoz do grupo municipal nacionalista en Raxoi, Rubén Cela, cando se fan dous anos do accidente de Angrois, amousou o apoio e a solidariedade do BNG coas vítimas, familiares e amizades, ademais de reivindicar a conexión do sistema ERTMS que segundo informes periciais tería evitado a traxedia. Neste sentido, requiriulle ao alcalde que non esqueza reclamalo nas negociacións que ten abertas co ADIF e con Fomento.

Para o BNG é “incomprensíbel e intolerábel” que dous anos despois este sistema de detención automática do tren de alta velocidade non estea activo, igual que no tramo Santiago de Compostela – Vigo que veñen de abrir. Lembrou que o BNG o requiriu mediante diversas iniciativas tanto no Concello de Santiago, no Parlamento galego, no Congreso e no Parlamento europeo.

Ademais, Rubén Cela demandou medios para que a Xustiza “poida cumprir a súa función, para poder ser rigorosa e garantista, cando dous anos despois nin se vislumbra cando pode ser a apertura de xuízo oral para depurar responsabilidades legais e políticas”.

Fixo tamén mención ao labor desenvolvido polos servizos públicos, como persoal sanitario, psicólogos, traballadores municipais, policía local e forzas de seguridade, protección civil e bombeiros, entre outros, “que seguen a padecer recortes que merman a súa capacidade de actuación, pese ao recoñecemento e agradecemento pola súa actuación nese sinistro”.

Para Rubén Cela tamén cómpre saber a verdade para que un “tráxico acontecemento semellante” non volva acontecer “mais PP e PSOE unen as súas forzas para evitar a comisión de investigación que reclama o BNG tanto no Parlamento galego como no Congreso”.

Ademais, citou os incumprimentos coa propia veciñanza de Angrois, pois as obras comprometidas seguen inacabadas na contorna onde se produciu o accidente.