Santiago de Compostela, 19 de novembro de 2021.- A portavoz municipal do BNG, Goretti Sanmartín, advertiu que o Goberno municipal non ten interese en negociar os Orzamentos municipais de 2022, pois na primeira xuntanza ofreceu “unha documentación vaga e incompleta“ que evidencia que o alcalde xa ten a súa folla de ruta trazada para ir a unha cuestión de confianza para facer eses orzamentos sen contar coas forzas da oposición.

“A falta de vontade negociadora do equipo de Sánchez Bugallo queda patente ao iniciar o primeiro contacto cos grupos na terceira semana de novembro, cunha documentación que nin sequera inclúe os investimentos previstos nin a marxe para negociar cos demais grupos, cando precisa apoios para a súa aprobación posto que o PSOE está a gobernar sen ter maioría na Corporación”, explicou.

“Son moitas as urxencias e vontade negociadora ningunha”, indicou Goretti Sanmartín. “Desde o BNG vimos reclamando que para aprobar uns orzamentos en tempo e forma hai que comezar a negocialos en setembro, mais a realidade é que dous meses e medio despois, o Goberno entréganos a todos os grupos unha folla con cifras globais dos gastos previstos e sen ningún dato desagregado de que investimentos pretende realizar”, engadiu.

De feito, a portavoz municipal nacionalista demandou a listaxe de investimentos confeccionada polo Goberno local e a resposta do alcalde foi: “nós temos a nosa lista máis non vola imos facilitar”. Así, pregúntase “que maneira de negociar é esa, cando o Goberno local está en minoría e non consensúa nin os proxectos para presentar aos fondos europeos nin as prioridades do Real Padroado que, como xa dixemos, ten unhas contas inexistentes”. Tamén bota en falta a convocatoria dos consellos sectoriais de participación veciñal para recoller propostas do conxunto da poboación que logo incluír nos Orzamentos municipais.