Santiago de Compostela, 19 de outubro de 2022.- A portavoz do grupo municipal do BNG, Goretti Sanmartín, trasladoulles ás persoas usuarias do Centro sociocomunitario da Porta do Camiño os parabéns polo resultado das reivindicacións que realizaron para abrir e retomar as actividades que realizaban antes da pandemia da covid-19. Ademais, lembrou que o BNG trasladou iniciativas ao Pleno do Concello e do Parlamento galego para esixirlle á Xunta que abrise estas instalacións, toda vez que as medidas de prevención sanitaria xa o permiten.

“É casualidade que xusto hoxe que se debate a iniciativa do BNG no Parlamento galego sexa a data escollida pola Xunta para a apertura do Centro sociocomunitario da Porta do Camiño”, explicou Goretti Sanmartín. “Foi a presión social e política, con mobilizacións na rúa e iniciativas do BNG no Concello e no Parlamento, quen conseguiron que hoxe abran as instalacións que prestaban servizo a numerosas persoas maiores usuarias que tiñan neste centro un lugar de encontro e de dinamización social”, indicou.

Ese espazo está dotado con salas de xogos, salón de peiteado, sala de rehabilitación, ciberaula, sala de lectura e cafetaría que permanecen pechados. Alí, con anterioridade á pandemia, participaban en actividades como baile, Pilates, pintura, informática, exercicios de memoria e organizaban excursións. “Felicitamos as persoas usuarias e agardamos que retomen estas actividades canto antes, pois o Goberno do PP na Xunta impediu que se reiniciasen hai máis dun ano, cando a situación sanitaria xa o permitía, co que privaron deste espazo de lecer as persoas maiores de Santiago de Compostela”, concluíu.