Santiago de Compostela, 18 de xullo de 2022.- O BNG trasladou á Comisión de Memoria histórica diversas propostas que xa foran a Pleno como o recoñecemento ás persoas do campo de concentración de Santa Isabel e o estudo para a retirada da simboloxía franquista que aínda perdura en edificios públicos e privados en Santiago de Compostela.

A portavoz municipal Goretti Sanmartín propuxo tamén na reunión que se impulse un proxecto, en chave local, para a investigación e recoñecemento das mulleres vítimas da represión, entre as que se encontran Maruxa e Coralia, coñecidas como “As Marías” e Consuelo Otero Rial, veciña de Conxo asasinada en 1936 a mans do franquismo.

O BNG reclamou no Pleno, a petición da Plataforma de Galeras, a instalación dunha placa cunha fotografía do edificio da cadea de Santa Isabel en memoria de milleiros de presos e vítimas de represión franquista que estiveron alí entre 1939 e 1946. “Desde o BNG alegrámonos de que, por fin, sexa unha realidade para dar a coñecer entre a veciñanza ese episodio da historia de Compostela”, explicou.

Ademais, o BNG trasladou en numerosas ocasións ao Pleno iniciativas para o estudo e retirada da simboloxía franquista, de acordo á Lei de Memoria histórica, tendo en conta que estabelece que as administracións públicas, no exercicio das súas competencias, tomarán as medidas oportunas para a retirada de escudos, insignias, placas e outros obxectos ou mencións conmemorativas de exaltación, persoal ou colectiva, da sublevación militar, da Guerra civil e da represión da Ditadura. Así, o feito de que esta simboloxía se sitúe en edificios que non fan parte do patrimonio municipal non exime o Goberno local de realizar as xestións precisas para que a Igrexa católica, Universidade, Correos ou calquera particular eliminen esas pezas.