Santiago de Compostela, 20 de decembro de 2021.- A portavoz municipal do BNG, Goretti Sanmartín, trasladará unha iniciativa ao Pleno de decembro para que o Goberno local dote de iluminación pública eficiente os accesos ao Museo do Pobo Galego, as rúas do Home Santo, da Angustia e aquelas zonas doutros barrios onde se detecte este problema.

 

O grupo municipal do BNG recibiu queixas da falta de iluminación pública nos accesos ao Museo do Pobo Galego, unha zona que queda completamente escura a partir das 18:00 horas durante o inverno. O feito de non dispor de luz no tramo de entrada, tanto desde a Costa de San Domingos como desde a rúa Ramón del Valle Inclán, dificulta a subida e baixada de escaleiras e, especialmente, o tránsito pola zona axardinada situada no frontal da Ala Sur.

 

Ademais, o BNG quere recordar que xa trasladou en reiteradas ocasións (decembro de 2015, marzo de 2020 e setembro de 2020) a necesidade dunha correcta iluminación das rúas do Home Santo e da Angustia, con proxección para as beirarrúas para reducir a contaminación, así como dos lugares doutros barrios onde se detecte este problema.

 

En concreto, nas rúas do Home Santo e da Angustia, onde se realizou unha intervención en 2011 con obras de renovación de pavimentos e de servizos, colocación de bancos de pedra e de árbores, quedou pendente instalar un novo sistema de iluminación para corrixir os problemas derivados da existencia de farolas antigas.

 

Na actualidade, a iluminación das rúas do Home Santo e da Angustia segue a ser deficiente pese a ser vías transitadas por centos de persoas que residen neses edificios, polas que acoden comprar nesa zona de comercio e polas que asisten ao local de ensaio dun grupo de danza e música tradicionais alí situado e que padecen estes problemas. Ademais de ser necesarios máis puntos de luz, moitas das farolas alí situadas están á altura do segundo andar dos edificios co que se perde a súa funcionalidade e provocan contaminación lumínica.