Santiago de Compostela, 5 de abril de 2022.- O grupo municipal do BNG trasladou ao Pleno de marzo catro mocións, relativas á promoción e coordinación das actividades socioculturais, ás medidas para reducir a inflación, ás necesidades de instalar paneis de comunicación social e ao conflito de Marrocos no Sáhara.

Así, aprobouse a moción para mellorar a difusión das actividades dos centros socioculturais e para descentralizar a oferta cultural en sinerxía co pequeno comercio. Na proposta de acordo figura que o Concello de Santiago, a través da empresa concesionaria das actividades dos centros socioculturais, realice unha maior difusión en distintos soportes das actividades programadas. Esta moción foi aprobada cos votos a favor de BNG, PP e CA; o PSOE abstense.

Ademais, ao fío desta moción acordouse que o Concello de Santiago planifique actividades arredor dos eventos culturais que teñan lugar no seu termo municipal, ofrecendo mesmo esta posibilidade a outras administracións que oferten programación cultural na nosa cidade. Tamén que se descentralice os actos culturais aos distintos barrios para favorecer a participación veciñal independentemente do lugar de residencia e dos recursos económicos, cos obxectivos de incrementar a cohesión social e a igualdade de oportunidades, ao tempo que se procuran sinerxías para a dinamización do pequeno comercio compostelán. Pularase pola coordinación de axendas de actividades das diferentes administracións e entidades privadas que conflúen na oferta cultural.

Moción con medidas para evitar a inflación

O BNG defendeu unha batería de medidas relativas ás actuacións que deben impulsar os gobernos galego e español para mitigar o impacto do medre disparado da inflación na sociedade e economía galegas. Entre elas, está demandar do Goberno central a intervención inmediata no sector enerxético para controlar os prezos da electricidade e do gas, recortar os beneficios das eléctricas, impulsar unha tarifa eléctrica galega, medidas urxentes para a contención da crise da industria electrointensiva a través dunha tarifa estábel que garanta prezos máximos a medio prazo e a prohibición os cortes das subministracións básicas de forma permanente. Reclamouse tamén demandar do Goberno central a baixada selectiva do IVE dos alimentos básicos, os produtos do mar, de hixiene persoal e feminina, o transporte público, a electricidade e o gas. Aprobouse esta moción do BNG coas propostas destinadas a reducir a inflación, cos votos a favor de BNG e CA e mais as abstencións de PP e do PSOE.

Outra das mocións do BNG, aprobada por unanimidade, foi para que se  habiliten paneis de comunicación social en emprazamentos visíbeis e transitados, tanto nos barrios como no centro da cidade, unha proposta que a formación nacionalista xa trasladou en diversas ocasións ao Pleno e ás negociacións dos Orzamentos. A normativa estabelece que estes paneis deben situarse, ademais de nos peches das obras, en soportes instalados polo Concello en emprazamentos visíbeis e transitados, para garantir a súa función. Tamén o Regulamento municipal de participación cidadá recoñece a finalidade destes taboleiros. Así mesmo, o seu tamaño debe ser o suficientemente amplo para a demanda existente nunha cidade coas características de Santiago de Compostela.

Aprobouse tamén, cos votos a favor de BNG e CA e coas abstencións de PP e PSOE, a moción para trasladarlle ao Goberno español o rexeitamento ao acordo con Marrocos que somete o pobo saharauí, logo de anos de ocupación ilegal do territorio do Sáhara Occidental e de vulneración dos dereitos humanos, co obxectivo de retornar á posición de buscar unha solución que garanta o respecto do dereito internacional e as resolucións para o recoñecemento do dereito de autodeterminación do pobo saharauí.

A información sobre proposicións, rogos e preguntas que levou o BNG a este Pleno pode consultarse na web http://santiago.bng.gal